ಸಿಎಂ ಭದ್ರತೆ ವೇಳೆ ಡಿಸಿಪಿ ನಂದಗಾವಿ ಮಾಡಿದ್ದೇನು???

ಹುಬ್ಬಳ್ಳಿ: ರಾಜ್ಯ ಸರ್ಕಾರ ಕ್ಯಾಬಿನೆಟ್ ನಲ್ಲಿ ಹಳೇಹುಬ್ಬಳ್ಳಿ ಗಲಭೆ ಪ್ರಕರಣ ಸೇರಿದಂತೆ ಒಟ್ಟು 43 ಪ್ರಕರಣವನ್ನು ವಾಪಾಸ್ ಪಡೆಯುವ ನಿರ್ಧಾರ ಮಾಡುತ್ತಿದ್ದಂತೆಯೇ ಬಿಜೆಪಿ ಈ ನಿರ್ಧಾರವನ್ನು ಖಂಡಿಸಿ ಹೋರಾಟದ ಹಾದಿ ತುಳಿದಿತ್ತು.

ಅದರ ಭಾಗವಾಗಿ ಹುಬ್ಬಳ್ಳಿಯಲ್ಲಿ ರವಿವಾರ ಧಾರವಾಡ ಜಿಲ್ಲೆಯ ಬಿಜೆಪಿ ಶಾಸಕರು ಸೇರಿದಂತೆ ಪಕ್ಷದ ಎಲ್ಲ ನಾಯಕರು, ಕಾರ್ಯಕರ್ತರು ಸಿಎಂ ಸಿದ್ದರಾಮಯ್ಯ ಅವರಿಗೆ ಪ್ರಕರಣವನ್ನು ವಾಪಾಸ್ ಪಡೆಯುವ ನಿರ್ಧಾರವನ್ನು ಪರಾಮರ್ಶೆ ಮಾಡಬೇಕೆಂದು ಮನವಿ ನೀಡಲು ಮುಂದಾಗಿದ್ದರು.

ಅಷ್ಟೇ ಏಕೆ ಅಕ್ಷಯಪಾರ್ಕ್ ಬಳಿಯಲ್ಲಿ ನಡುರಸ್ತೆಯಲ್ಲಿ ಕುಳಿತು ಪ್ರತಿಭಟನೆ ಮಾಡಿದರು. ಈ ವೇಳೆ ಹು-ಧಾ ಪೊಲೀಸ್ ಕಮಿಷನರ್ ವ್ಯಾಪ್ತಿಯ ಪೊಲೀಸರ ದಕ್ಷ ಕಾರ್ಯದಿಂದ ಪ್ರತಿಭಟನಾಕಾರರ ಹೋರಾಟವನ್ನು ಹತ್ತಿಕ್ಕಿ, ವಶಕ್ಕೆ ಪಡೆಯುವ ಕೆಲಸ ಮಾಡಿದರು.

ಅಷ್ಟೇ ಅಲ್ಲದೇ ಏಕಾಏಕಿ ಸಿಎಂಗೆ ಕಪ್ಪು ಬಟ್ಟೆ ಪ್ರದರ್ಶನಕ್ಕೆ ಮುಂದಾಗಿದ್ದ ಬಿಜೆಪಿ ಇಬ್ಬರು ಕಾರ್ಯಕರ್ತರನ್ನು ಕೂಡಲೇ ಕಪ್ಪು ಬಟ್ಟೆಯನ್ನು ಕಸಿದು, ಪೊಲೀಸರು ಇಬ್ಬರನ್ನು ವಶಕ್ಕೆ ಪಡೆದುಕೊಂಡಿದ್ದರು. ಈ ಮೂಲಕ ನಗರದಲ್ಲಿ ಶಾಂತಿ ಸುವ್ಯವಸ್ಥೆ ಕಾಪಾಡಿದ್ದರು.

ಮತ್ತೊಂದೆಡೆ ಧಾರವಾಡದಲ್ಲಿ ಸಿಎಂ ಕಾರಿಗೆ ಮೊಟ್ಟೆ ಹೊಡೆಯಲು ಪ್ಲಾನ್ ರೂಪಿಸಿದ ಬಿಜೆಪಿ ಕಾರ್ಯಕರ್ತರ ಪ್ಲಾನ್\’ನ್ನು ಕಾನೂನು ಸುವ್ಯವಸ್ಥೆ ಡಿಸಿಪಿ ಮಹನಿಂಗ ನಂದಗಾವಿ ಪ್ಲಾಪ್ ಮಾಡಿದ್ದಾರೆ.

ಸಿಎಂ ಕಾರಿಗೆ ಮುರುಘಾಮಠದ ಹತ್ತಿರದಲ್ಲಿ ಮೊಟ್ಟೆ ಹೊಡೆಯುವ ಬಗ್ಗೆ ಮಾಹಿತಿ ಸಿಗುತ್ತಿದ್ದಂತೆಯೇ ಕೂಡಲೇ ಅಲರ್ಟ್ ಆದ ಡಿಸಿಪಿ ನಂದಗಾವಿ ಸ್ಥಳಕ್ಕೆ ಆಗಮಿಸಿ,‌ ಸ್ವತಃ ತಾವೇ ಮನೆ ಮನೆಗೆ ತೆರಳಿ ತಪಾಸಣೆ ಮಾಡಿದ್ದಾರೆ. ಅಷ್ಟೇ ಅಲ್ಲದೇ ಮೊಟ್ಟೆ ಹೊಡೆಯುವ ಯೋಜನೆಯನ್ನು ಮಾಡಿದ್ದ ಬಿಜೆಪಿ ಕಾರ್ಯಕರ್ತರನ್ನು ವಶಕ್ಕೆ ಪಡೆದು ಮುಂದಾಗುತ್ತಿದ್ದ ಅನಾಹುತವನ್ನು ತಪ್ಪಿಸಿದ್ದಾರೆ. ಈ ಮೂಲಕ ಎಲ್ಲಿಯೂ ಕೂಡಾ ಭದ್ರತಾ ಲೋಪ ಆಗದಂತೆ ಸಮಯಪ್ರಜ್ಞೆಯಿಂದ ಮುನ್ನೆಚ್ಚರಿಕೆ ಕ್ರಮ ಕೈಗೊಂಡು ಪೊಲೀಸರ ಭದ್ರತೆಯ ಮಹತ್ವವನ್ನು ಎತ್ತಿ ಹಿಡಿದಿದ್ದಾರೆ.